Darthlalang

Mizote hian thiamna lamah te, zirna lamah te, incheina leh kawng engkimah hma kan sawnin, hnam changkang zawkte tih dan kan la nasa hle. A then chuan an tawng dan leh kechheh thlengin kan entawn (copy) emaw tih tur a ni a; mahse kan hriat reng tur chu ‘Mizo kan ni’ tih hi a ni.
Hnam dang tih dan changkang leh mawi tak tak: kan incheina te, khawl (eletronics) thil tha ber ber te, lirthei ke li nei (car) changkang tak tak te kan neiin kan hre hlur a;mahse kan mize thalo leh mawi lo tak, siam that ngaite erawh hre lovin kan dah tha ve leh thung si hi a pawi lai ber chu a ni.

---

Mizo mipa te hian kan hmeichhiate hi kan zah thiam (respect) em em tur a ni. A bikin hnam dang karah phei chuan Mizoin kan tih thin, thian leh thian (mipa leh hmeichhia inngaizawng ni si lova) inkuah dul dul te, innel lutuk vanga inchum rik dawm dawm te, inchul nel lutuk te, kuah uai thluk lek lek te, taksa inkhawih paha infiam te, tawngkam mawi lo leh tha lo taka infiam thin te, zah pah lo taka thu sawi bawrh bawrh te hi kan Mizo nun mawi tak tlawmngaihna nun leh Kristian nun nen a inhmeh lo em em a; heng kawngah hian Mizote kan fimkhur a tha hle.

Mizo hmeichhiate pawh kan bang chuang lo. Mi karah kan mipate kan zah thiam a tul a, kan hnial zut zut tur a ni lo; thu hla ngah taka rorel zut zut te, tawng theih lutuk te, intifing rem hre lutuk te nih loh i tum hram ang u. Kan bula miten engmah an sawi ve loh avang maiin engmah hre lo turah ngaih ngawt chi a ni lo, i lo intifing/rem hre sual hlauh dah ang e. Tawng tlem, inthlahrung leh inngaitlawm taka nun hi hmeichhe tan a mawi em em a ni.

Mi chanchin a tha lo zawnga kan sawi peih lutukte hian mi chhungkua/thiante/thenawmte thlarau nun a tichau fo thin a; mi dang tana malsawmna leh thatna thlen theitu ni lo thu reng reng sawi lo turin kan lei leh ka i veng fimkhur theuh ang u. Mi tlin lohna leh fel lohna kan hria a nih chuan rel mai lovin, hmaichhanah hmangaih leh duhsak takin hrilh thin ila, chu chuan thinlung a hneh duh em em a; an tan malsawmna i nih theih mai bakah thlarau bo chhanchhuaktu hial pawh i ni thei a ni.

Incheina uchuak lutuk te, neih piah lama thawmhnaw man to lutuk hak te hi mi puitlinglo zia a ni tih hre reng la. Heng lunghlu (diamond), rangkachak (gold) leh thil dang a kaihhnawihte hian nangmahah khan eng ang takin nge thu a sawi inenfiah thin ang che. Heng thilte hi Pathian huat ber, hmuh theih miah si loh chhungril chapona thlentu an ni fo thin.

Hmuh theiha mawi leh nalh, man to leh tha,lunghlu leh rangkachakte ai chuan kan nuna sim ngai leh tha lo awm zawng zawngte simin, nun dan mawi leh tha, thianghlim leh fel, inngaihtlawmna nun nen bul i tan thar theuh ang u.

Ziaktu: Pi Laldinpuii (Dindini)