Beiseina Nung Online Crusade Oct 2 - 25, 2020 Zan dar 8-ah Friday, Saturday & Sunday zan apianga neih tur a ni ang. Speaker tur hi Pastor Tawkthanga, President of Mizo Conference of SDA Church, Mizoram a ni ang a, khawvel hmun hrang hranga kan mizo zaithiam tak takten fakna an rawn nei bawk ang. A hnuaia video-te hi lo thlir la, he crusade hi nang leh i chhungte tan entianga pawimawh nge a nih tih i lo ngaihtuah dawn nia.

Kohhran hruaitute inhmukhawm chuan Covid-19 (Coronavirus) vanga kohhran kal zel dan tur a rel a.  Thu tlukna te chu hetiang hi a ni (A tul dan a zirin he post hi update zel a ni ang, i lo check thin dawn nia):
(a) Kohhran Inkhawm zawng zawng chu Live Stream leh Zoom Video Calling hmanga buatsaih a ni ang a, mahni awm hmun atang thlir theih tura buatsaih a ni ang.

1. Tawngtai Inkhawm (Prayer Meeting) hi Zoom Video Calling service hmanga buatsaih a ni ang. iPhone Zoom App leh Android Zoom App atanga in-register ngai lova thlir theih a ni ang. Zoom Number (ID) chu: 6132856525. Tawngtai Inkhawm hi Wednesday (Nilai Zan dar 7:30) ah tan a ni ang.
2. Vesper Sevices, Sabbath School & Divine Service inkhawmte hi kohhran website -ah leh YouTube atanga thlir theih a ni ang. Smart TV ah pawh YouTube app atang a thlir theih bawk ang.

(b) Potluck leh AY a awm lovang.
(c) April thla tawp thleng kohhran hminga inkhawm kan neih chu Vesper, Sabbath School leh Divine Service a ni rih ang. Sorkar thuchhuak a zirin tih danglam zel a ni ang a, member-te WhatsApp group leh website hmanga hriattir kan ni ang.
(d) Kohhran program ruahmansa zawng zawnga chanvo neite leh tawngtai inkhawm, potluck leh AY telin April thla tawp thleng cancelled a ni e.
(e) CDC.gov leh coronavirus.maryland.gov website atanga an puan chanchin te leh hriattirna thu te hi an rinthlak ber a, WhatApp leh facebook vela chanchinte hi chhiar tam lo turin leh finfiah hmaa ring nghal mai zel lo turin kan fimkhur theuh bawk dawn a nia.

Tv Laldinpuia Ralte leh Nl Lalnunmawii Pachuau te chuan Pathian leh A kohhran mipuite hmaah nupaa insiam turin "tiam tlat e" an ti dawn a. Kohhran member zawng zawngte sawm kan ni e. 
Tv Laldinpuia Ralte hi kohhrana mi tangkai tak a nih bakah music leh zai hruaitu tha tak a ni a. Ama zarah kohhran pawhin zai rawngbawlna lamah hma kan sawn hle a ni. Tin, Nl Lalnunmawii Pachuau pawh hi member that tak a ni a, Sabbath School leh AY leader (OB member) a ni a. Pathian tana rawngbawlnaah theihtawp chhuah thin mi a ni bawk. 
Hetianga kan member duhawm tak ten inneihna an buatsaih thei hi kan kohhran pawhin a lawmpui em em a, nupa duhawm tak leh Pathian malsawmna dawng a, fanau maltluan chawi dun thei ngei turin duhsakna sang ber kan hlan a ni.
A Hun: 4pm to 7pm, Nov 10, 2019 (Ceremony & Reception Programs)
A Hmun: Remnant Seventh-day Adventist Church,
                15121 McKnew Rd, Burtonsville, MD 20866

Kohhran thalaite zingah Tv Nathan Chhakchhuak leh Nl Ellen Chhakchhuak highschool chu tha takin an graduate theih avangin kan lawmpui em em a ni. Sabbath School department leh AY Ministries department hmingin lawmthu sawina leh chawimawina certificate-te August ni 17 khan an hlan a ni.
Tv Nathan-a hian a sikul, Spencersville Adventist Academy-ah highschool a zir zova, a highschool kal chhunga nun entawntlak leh tangkai tak a nih thin avangin a sikul chuan chawimawina sang ber award a graduate niah a hlan nghe nghe a ni.
Nl Ellen-i pawh hian a sikul Takoma Academy atang a graduate a. Senior high school kum chhung atan president-ah thlan a ni a, an zirtirte pawhin chawimawina certificate an hla nghe nghe bawk a ni. Hetiang kan mizo thalaiten hnam dang sap leh mi hrang zingah dinhmun pawimawh leh chawimawina te an dawng hi keini an kohhran memberpuite pawhin kan chhuang a, Pathian kan fak a, an kal zelna turah pawh duhsakna sang ber kan hlan a ni. Pathianin a rawngbawltu ropui tak ni turin thuamin tanpui zel rawh se. Amen.

A Hnuaiah hian Nathan-a leh Ellen-i te Graduation Slideshow i thlir thei ang.

Jun 15 Sabbath ni khan Mt Aetna-ah Chesapeake Conference huapa neih camp meeting-ah kan kohhran pawhin kan va chhim ve a, chhun chawi eihona out door-ah kan nei a, kan tlai khawp mai. Choir hla sain kan va perform ve bawk a, chubakah Chesapeake Conference huap chhunga hnam hrang hrangte nen mahni tawng theuhin hla kan sa rual thup thup a, a va han hlimawm tak em! Tin, kohhran hrang hrang atanga kum khat chhunga an rawngbawlna highlights hrang hrang an rawn tarlante thlirhona leh ngaihthlakna hun kan hmang bawk a, a ropui kan ti hle a ni. A hnuaiah hian thlalak tlem kan rawn tar lang e.

Nute Ni (Mother's Day) kan kohhran chuan kan hmang a, Sabbath School department-in an rawn buatsaih a, hruaitute chungah lawmthu awm rawh se.  He program-ah hian nute hnena pangpar mawi hlanna te leh Pastor Arunana hnen atanga malsawm tawngtaisakna te neih a ni.
​Pathian hmangaihna ropui kan hriatthiam dan pakhat chu nu hmangaihna kan hriatthiam atang hian a hriat theih a ni. Nu hian a fa a hmangaihna a, chhungkaw tana theih tawp chhuaha tan a la a, tin, a fate tan a nunna hial pawh a hlan ngam ang hian kan Pa Pathian chuan keini a fate (mihringte) hi min hmangaih a, a nunna hial pawh a hlan phal a nih kha. Chu mai pawh ni lovin, amah hua a, a hmelma ni mekte tan pawh a nunna a hlan phal a ni. A va ropui em! Nute Ni hman nuam u le!

Kan program hmanna thlalak thenkhat hetah hian a thlir theih ang. Click Rawh

8Kan kohhran member-te, Tv Lalrinhlua Chhakchhuak leh Nl Laldinpuii Khawlhring te chuan kohhran dan thianghlimin an damchhunga nupa ni turin inneihna leh thutiam inhlanna chu Pathian leh A kohhran mipui te hmaah an nei dawn a.
Tv Lalrinhlua hi Mizo SDA kohhrana thalai Youth Leader a ni a, tin, Nl Laldinpuii hi Church Assistant Clerk a ni. An pahnih hian kohhrana nula leh tlangval fel tak an ni a, Pathian malsawmna ropui tak dawngin an pahnih hian zaithiam tak an ni ve ve bawk. An awrawl te leh an theihna zawng zawng te nen thahnemngai takin Pathian leh A kohhran tan an inhmang thin a, hetianga Pathian leh mipuite hriatpuina ngeia thu intiamna leh inneihna thianghlim tak an neih theih dawn a vang hian a ropui hle a ni.
He inneihna thianghlim hi Pathian hriatpui lo ni se la, chhungkaw duhawm tak lo dinin fanau maltluan chawia mite tana malsawmna pawh lo ni turin Pathianin malsawm mawlh rawh se. Amen.

He inneihnaah hi rawn lawmpuia lo kal turin mitinte sawm kan ni.
A Ni: Sunday, April 14, 2019
A Hun: 4 - 8 pm
A Hmun: Reaching Hearts SDA Church, 6100 Brooklyn Bridge Rd, Laurel, MD 20707

Kan kohhranin March 20 atang 30 thleng chawlhkar khat chuang Revival Meeting a buatsaih dawn a. Kan speaker tur atan Mizoram lam atanga khuallian Pi Rosiami a ni ang. Pi Rosiami hi thusawi thiam leh Pathian tana rawngbawlna lama tuimi tak a ni a, a thusawite hi thlarau lam tana hmasawnna thute a ni a, a ngaithla apiangten an hlawkpui zel a ni. He hun hi mahni tan leh kan chhehvela u leh naute tan lo ni se, he inkhawmnaah hian mitam tak rawn tel ve turin kan sawm theuh dawn a nia.
Kan program hman dan tur leh tan hun turte chu kan Bulletin page-ah hian a thlir theih ang.
A hnuaiah hian Pi Rosiami sermon video clip tawi a thlir theih e.

Pathian awmpuina leh kaihhruaina zarah kumtina kan lo tih thin General Conference huaihawt, Global Youth Day chu March 16th, 2019 ni khan tluang leh tha takin kan hmang ve leh thei a, a lawmawmin kan hlawkpui hle a ni. He ni hi March chawlhkar 3-na zela kumtin neih thin a ni a, thupuiah pawh "Be the Sermon" tiin, mite tana luanchhuahna ni atan kan lo hmang thin a ni. Khawvel hmuntina awm Adventist Thalaiten mahni khawtlang theuhah kawng hrang hranga chet chhuah rawngbawlna neih nan kan hmang thin a ni. (GYD hrechiang duh tan, globalyouthday.org hi a visit theih e)

Keini Mizo Seventh-day Adventist thalaite pawhin he ni bikah hian chet chhuah rawngbawlna kawng hrang hrang kan nei ve thin a. Group hnih/thumah te kan inthen darh a, veng hrang hrangah thilpek tanpui leh tawngtaisakin rawngbawlin kan pen chhuak thin a ni. Tin, lehkhabu kan sem thin a, damdawiin leh nursing home te tlawhin tawngtaina leh Pathian faka zaipuina te kan hmanpui thin a, Mall-ah te leh kawng sirah dingin Lehkha sem leh Pathian thu CD/DVD te a thlawnin kan sem thin a ni.

Mahse, tuntum chu kum dang ang lo takin hmun khat chauh bitumin hun kan hmang ve thung a. Sabbath zingah thalai te Biakin ah kan infuankhawm a, Sabbath School program kan hman zawhah chuan Head Elder Pu Vanlalsawnan malsawm tawngtaina nen min thlah liam a, Washington D.C. veng lun laia park pakhata mirethei, in leh lo, eiin tlachham leh selfen nei lote tan tanpuina hun kan va nei a a hlimawm kher mai. He hmunah hian chutiang tanpuingaite chu an tam hle a, kan ei tur leh in tur chi hrang hrang mi 200 chuang eikhawp kan kente chu kan sem ta a ni. Naupangte pawh an lo awm ve nual a, an hmalam hun tur han thlirsak chuan an lainatawm duh khawp mai. Tichuan, Pathian thu lehkhabu tha tak tak te pawh kan sem zel bawk a, an hlim hmel hmuh leh an lawmthusawi han hriat chuan mi an tihlim khawp mai. An dinhmuna kan ding ve lo pawh hi Pathian malsawmna leh thatna kan chungah lantirin a awm tih hairual a ni lo. Chutiangchuan, helai hmun pakhat chauhah hian nilengin rawngbawlna hun hlimawm tak kan hmang ta a ni.
Kan piah lawkah pawh keimahni ang tho organization (Adventist kohhran ni lo) dangten chaw, thuamhnaw leh puante an rawn sem ve bawk a, an ni pawh an titha khawp mai.

Nasa zawka Pathian rawng kan bawl zel theih nan thalaite Lalpan mal min sawm zel se la, kan hun tha neihte hi tawngkai tak leh fing leh fel taka hmangthiam a, Global Youth Day chauh pawh ni lovin, nitina Thlarau Thianghlima khata rawngbawl chho zel thei turin Lalpan mal min sawm theuh bawk rawh se. Amen.

Report-tu: David Mawizuala
Edit-tu: Tarry Nghaka

March 31, 2019 lo thleng tur Sunday ni 10:00 AM, Chesapeak Conference office 6600 Martin, Rd, Columbia, MD 21044 ah khian Chesapeake Conference huapa Women's Ministry hminga rawngbawlna atan inzirtirna program buatsaih a ni dawn a. He program-ah hian hmeichhiate pawimawhna leh rawngbawlnaah hian thil an tihtheihzia inzirtirna leh fuihna thu tha tak takte ngaihthlakna hun siam a ni ang. A thei apiang va chhim ve turin kan han inhriattir a ni e, a bik takin nu leh nula te tan. Lunch ei man leh meterial man atan in-register nan mi pakhatah $20 a ni ang. A hnuaia link atang hian in-register tur a ni a, emaw Pi Liandingpuii Fanai hrilhin a in-register theih bawk a ni.

       Tun Sabbath lo thleng tur inkhawmnaah kan G.C. lam aṭangin khuallian duhawm tak Pastor Dr. Andrés J. Peralta (Associate Youth Director)-in Pathian thuchah a rawn sawi dawn a, member-te kim taka inkhawm turin kan han insawm a ni e. Tichuan, tlai lamah thalaite nen inkawmhona hun buatsaih a ni ang a, zawhnate zawh hun siam a ni ang. Tin, rawngbawlna lama thalaiten hma kan sawn theihna turin hma lak thiam dan pawh min rawn zirtir dawn a ni. He hunah hian thalaite kim taka tel turin kan han insawm a ni. 
        Dr. Andrés J. Peralta hi ordained minister a ni a, Santo Domingo, Dominican Republic-a piang leh sei lian a ni. Pathian kohna chhangin Puerto Rico rama Antillean Adventist University-ah Theology (B.A.) a zir zo a ni. Chumi zawhah, Andrews University aṭang Master of Divinity a zir zo leh a. Chutianga M.A. a zir mek lai chuan, Maranatha Spanish kohhranah leh Grand Rapids Central Spanish kohhranahte Youth Pastor hna a thawk kawp ṭhin a ni. Tunah hian, World Pathfinder Director leh Associate Youth Director (General Conference) nihna a chelh mek a ni.

       Tun Sabbath inkhawm (Divine Service)-a thuchah puanga thalaite nena inkawmna hun min rawn neihpui theih dawn avangin Pathian chungah lawmthu kan sawi a, amah, Dr. Andrés Peralta-a pawh kohhran hmingin kan welcome e.

Valentine's Day party kan kohhranin a buatsaih chu Sligo church-ah kan chhehvela mizo unaute nen hlim takin February ni 16 zanah khan neih a ni a. He party-ah hian nupa inkara hmangaihna tihnun a pawimawhnate leh nula leh tlangvel inngaizawng mekte tana zirlai zir turte fuihna thu hmangin Pastor Arunan-an a sawi a. Tin, chu mi zawhah intihhlimna chi hrang puitling leh naupangte tan buaisaih a ni. Tichuan, ei leh in tui taka siam chu tlai leh puar taka kil ho a ni bawk.  Zan hlimawm a va ni tak em!
He party-a lo kal zawng zawngte hnenah kohhran hmingin Pastor Arunan-a leh Upa Vanrotluanga ten thilpekte an hlan a, tin, intihsiaknaa lawmman dawngte hnenah pawh hlan bawk a ni. An inkhawmna hmun phal taka hman min phalsaktu Sligo mizo unaute hnenah lawmthu awm rawh se.

Chesapeake Conference buatsaih MissionWorks training program chu North America Division headquarter Columbia, Maryland-ah kan kohhran aiawhin church board member-ten an va chhim a, Friaday (2/8/19) zan atang Sabbath (2/9/19) tlai lam thleng training-na leh inkhawm program hun hman a ni. He training-ah hian kan chhevela awm non-adventist-te hnena chak zawka rawngbawlna neih theihdan turte zirhona neih a ni.

Feb 5 @8 pm: Communication Committee
Feb 7 @8pm: Finance Committee
Feb 8-9: Mission Works in NAD Training
Feb 14 @8 pm: Elders Board Meeting
Feb 16 (Evening): Valentine’s Day Celebration
​Feb 23 @6pm: Church Board Meeting
Mar 2: Youth Meets and Planning (with Pastor Dr. Andres Peralta, G.C. Associate Youth Director)
Note: Dah belh zel a ni ang...